Setti inn myndir frá Rhodos, Fjallaferðinni miklu sem farin var þessa helgi (segi frá því síðar) og Steingrímsstöð sem við fórum í um verslunarmannahelgina. Er undir "ný myndasíða" vinstra megin neðst.

Kv. HP 

Tvær vikur búnar af sumarfríinu og því rétt hálfnað. Fyrsta vikan var bara tekin rólega,bíltúrar hingað og þangað og svo auðvitað fór mikill tími í að hlakka til fyrir Rhodosferðina okkar Benedikts.

Laugardaginn 21. júlí vöknuðum við kl. 3:30 um nóttina. Benedikt fannst þetta ægilega skrýtið, talaði um það heillengi á eftir að hafa þurft að vakna um miðja nótt. Flugið út gekk ágætlega, einungis sex tímar Það gætti á smá óþolinmæði hjá lillanum, enda er ég búin að ákveða að kaupa DVD ferðaspilara áður en við förum aftur út.

Hitinn á Rhodos var SVAKALEGUR. Fór örugglega ekki undir 40 stig. Einn daginn var meira að segja 48 stig en það var í bænum Lindos. Við fórum þangað í ferðalag með ferðaskrifstofunni ásamt því að við fórum að skoða bruggverksmiðju og nokkrar kirkjur. Skemmtum okkur frábærlega vel. Hélt reyndar að ég myndi bókstaflega deyja við að ganga upp brekkuna frá Lindos og að rútunni. Þetta er nefnilega lítill bær með örþröngum götum, helst gátu ekki nema þrír gengið hlið við hlið.

Í heild var ferðin ágæt. Benedikt var með kaupæði, vildi stöðugt vera að kaupa og kaupa einhverja draslhluti. Ég lét það eftir honum endrum og eins. Ég er reyndar búin að ákveða það að fara aldrei aftur til Grikklands á þessum tíma, allt ALLT of heitt. Í fyrra vorum við reyndar á Krít á þessum tíma, fannst það samt ekki jafnsvaðalegt og þetta. Komst líka að þeirri niðurstöðu að lítil og kósý hótel eru miklu betri heldur en 17 hæða, 700 herbergja, fimm stjörnu hótel. Morgnarnir byrjuðu yfirleitt á því að bíða í korter eftir lyftunum, við enduðum einu sinni á því að ganga niður 13 hæðir. Eftir tvo daga bað ég um flutning þar sem ég svaf ekki fyrir áhyggjum af því að Benedikt dytti niður af svölunum. Þetta voru nefnilega ekki mjög barnvænar svalir, stórt bil á handriðinu akkúrat í mittishæðinni á honum. Fengum herbergi á fimmtu hæð með engum svölum.

Á hótelinu voru allra þjóða kvikindi, Bretar, Ítalir, Hollendingar, Grikkir og Norðurlandabúar. Flestir voru með hálft fæði innifalið eins og við og jiminn....... þvílíkan ágang og græðgi hef ég aldrei á ævi minni séð. Fólk hamstraði matinn eins og þetta væri síðasta kvöldmáltíðin og skyldi svo meirihlutann eftir á disknum sínum. Hugsar fólk ekkert um örbirgð heimsins og svöngu börnin? Ég meina, hver étur tíu ristaðar brauðsneiðar í morgunmat?

Eftir þetta ferðalag var ég voðalega fegin að koma heim í "kuldann" og á jarðhæðina mína. Engir frekir og snobbaðir útlendingar að garga á Benedikt fyrir að fikta í útisturtunum, engar lyftur, bara fjórar tröppur niður og bara 12 stiga hiti en ekki 48°C. Mæli samt alveg með Rhodos fyrir þá sem þola hita mmmmmjöööög vel.

Við eigum tvær vikur eftir af sumarfríinu, sem verða nýttar í afslöppun og sumarbústaðaferð með ömmu Sigrúnu. Jebbsss..... við erum enn eitt árið að fara í Steingrímsstöð við Sogið. Finnst sumarið vera alveg glatað ef ég kemst ekki þangað. Láta ömmu stjana við sig og svona..... nei, smá grín. Stjana frekar við hana. Auðvitað skellum við út stönginni, pabbi er búinn að kaupa makríl. Benedikt er svakalega spenntur.

Læt þetta duga núna

Yassou, yamas og skál fyrir því 

Jæja, mín er barasta komin inn í kennararéttindanám í Kennó. Fékk bréfið í dag..... Hugsa að ég skelli mér. Veit ekki alveg hvort ég þarf að taka 15 eða 30 einingar.... kemur í ljós seinna meir. Tek þetta í fjarnámi, þ.e. mæti bara nokkra daga í einu í skólann og verð svo að læra bara við tölvuna. verður örugglega megaspennó

Annars var helgin bara róleg. Fór í sveitaferð með Benedikt á föstudag. Sáum lítil lömb fæðast, fannst það æði... hef nefnilega aldrei séð lömb fæðast. Fyndið að sjá allar ærnar saman í bás með útþanin klof. Ægilegt ef það væri farið svona með okkur

Á laugardaginn fylgdumst við með Risessunni í bænum. Benedikt varð pínuhræddur, grét fyrst smávegis, faldi sig svo bakvið bíla og kíkti í gegnum rúðurnar á dúkkuna. Eftir smástund fannst honum þetta alveg frábært. Hann klippti meira að segja út myndir af Risessunni til að fara með í leikskólann. Um kvöldið horfðum við auðvitað á Júró. Fannst lagið fínt sem vann. Ragnar og Dóra sátu hérna hjá okkur og fóru svo í bæinn. Fylgdist eitthvað með kosningasjónvarpinu og var ægilega glöð þegar ég fór að sofa þegar ég sá að stjórnin var fallin. Morguninn eftir var hins vegar komin breytt staða.... Vona bara að prumpuflokkurinn Framsókn verði ekki í ríkisstjórn. Heyrðuði að Jóna Bjarta vildi halda áfram sem ráðherra þó hún hafi ekki verið þjóðkjörin á þing. Þvílíkur hroki!!!

 

Ætla að hætta að pirra mig á þessu

Kveð að sinni 

Við píurnar úr vinnunni fórum síðustu helgi til Ljubljana í Slóveníu til að kynna okkur hjúkrunarheimili þar í bæ. Ferðin var vægast sagt æði og við erum strax byrjaðar að skipuleggja ferð til Rómar næsta vor. Ég var langyngst en hinar eru á bilinu 18-36 árum eldri en ég!!! Skemmti mér samt alveg konunglega.

Ljubljana er ofsalega falleg borg og veðrið skemmdi ekki fyrir, 25 gráður yfir daginn og glampandi sól. Við komum seinnipart fimmtudags og brunuðum auðvitað beint í mollið. Náðum að versla eitthvað en fórum svo á pizzastað um kvöldið. Daginn eftir var farið í skipulagða gönguferð um bæinn og helstu staðir skoðaðir. Löbbuðum í meira en tvo tíma og þar af var gengið upp á mjög stóran hól í miðju borgarinnar. Þar upp á var kastali og útsýnið var stórfenglegt. Sáum alla leið til Alpanna. Seinnipartinn var svo haldið á hjúkrunarheimilið. Við skoðuðum það og fengum síðan flottar veitingar, þ.á m. slóvenskt rauðvín, sem var bara úbergott þó ég sé ekki mikið fyrir rautt. Um kvöldið fórum við út að borða og ætluðum á djammið en þar sem maður er svo gamall og þreyttur þá gáfumst við fljótt upp á skemmtistaðnum og héldum heim í ból.

Á laugardeginum var haldið í mikla ferð í Postonja-hellana og Pradjama-kastalann. Ég held að ég hafi gengið af mér rassinn. Hellarnir voru rosalega flottir en ískaldir, kom til baka með kvef. Kastalinn er svolítið spes. Hann er í raun byggður fyrir framan helli lengst uppi í bergklettinum. Eftir ferðina var síðan rokið beint í mollið. Ég held að mér hafi sjaldan liðið jafnilla í fótunum. Vældi og vældi í rúmmeitinu mínu um það að ég væri örugglega að fá blóðtappa þar sem stór bláæð í lærinu á mér stóð nokkra sentimetra út. Hélt allavega að ég kæmist ekki lifandi heim....

Um kvöldið fórum við svo fínt út að borða. Staðurinn var hertekinn Íslendingum. Það voru nefnilega nokkrir hópar þarna úti með okkur. Náðum alveg ótrúlega vel saman við nokkra þarna úti.... Skiptumst meðal annars á minjagripum við eitt fyrirtækið. Við fenum áritaða skyrtu með nafni fyrirtækisins og þeir fengu flotta súmóbleyju sem ein okkar hafði klæðst kvöldinu áður (utan yfir buxurnar reyndar). Þær voru nefnilega nokkrar sem fóru í "súmóglímu" í súmóbleyju...

Á sunnudeginum var flóamarkaður í bænum og við gerðum heldur betur góð kaup. Ég keypti forláta kaffikvörn (svona gamaldags), bronsmortél og bronsbjöllu til að hengja upp á vegg, veit reyndar ekki alveg hvar ég á að hengja hana upp. Hún er samt algjört æði.

 

Ég allavega mæli með þessari borg.... Slóvenar mættu samt alveg vera þjónustulundaðri, hótelið gerði nokkur mistök, ekki alvarleg en tvær úr okkar hópi voru settar á herbergi sem var þegar í útláni. Síðan létu þeir mann alveg finna fyrir því ef þeir voru þreytti og pirraðir í búðunum. Landið er samt æði og fullt af flottum gæjum

Kveð að sinni

 

 

Haha... þetta er svolítið fyndið... prófið þetta

Í dag eru 5 ár síðan litla ástin mín kom í heiminn. Ótrúlegt hvað tíminn er fljótur að líða. Lillinn minn, sem ég hélt á í fanginu á mér í fyrsta sinn fyrir örstuttri stund síðan, er að fara í skóla á næsta ári. Hann er reyndar ákveðinn í að fara ekki í skóla heldur ætlar hann að vera í leikskóla það sem eftir er.

 Dagurinn byrjaði þannig að móðir hans vakti hann með fögrum söng sínum í morgunsárið. Síðan söng hann af alefli fyrir sjálfan sig sem endaði þannig að ég kom of seint í vinnuna. Í dag fór hann með snakk og melónur í leikskólann til að bjóða hinum krökkunum upp á. Eftir leikskólann fórum við síðan með Ragnheiði á Pizza Hut og fékk hann að gera sér ís sjálfur. Á laugardaginn ætlar hann að halda þetta þvílíka teiti með um 30 manns. Verst að ég á bara stóla fyrir helminginn af fólkinu. Sorry, einhverjir þurfa að standa 

Um kvöldið fer hann svo í pössun til mömmu og Óskars og ég ætla að halda partý....

Kveð að sinni... 

Heilmikið í fréttum. Ég er komin með ný augu. Jebb, fór í laseraðgerð á augunum síðasta föstudag. Lýg því ekki að þetta var frekar óþægilegt, sérstaklega þegar ég fann brunalyktina af augunum á mér en þetta er allt að koma núna. Aldrei (vonandi) aftur gleraugu.  Helgin fór því bara í það að slaka á og hvíla sig, svona nokkurn veginn. Ragnheiður var svo góð að hjúkra mér um helgina...

Helgina þar á undan fór ég með Blöndahls-fjölskyldunni á þorrablót á Laugarvatni. Ji, hvað það var gaman. Við Ragnheiður vorum að til hálfsex um morguninn. Reyndum meira að segja að brjótast inn í gufuna, var mjög fegin daginn eftir að hafa ekki komist yfir grindverkið, hefði annars setið föst þar til tvö daginn eftir. Svo var frusshúmorinn náttúrulega á hæsta. Þið getið séð myndirnar inni á myndasíðunni. Setti líka þorrablótsmyndirnar síðan í fyrra.

 Þessi vika verður bara tekin rólega enda vel þreytt eftir aðgerðina. Svaf nánast ekkert um helgina, var svo hrædd um að reka puttana í augun eða eitthvað. Fer svo á sáranámskeið á fimmtudag og föstudag.

Adios að sinni 

Ég var ekki alveg fyrst viss hvort ég ætti að halda áfram með þessa síðu. Nenni yfirleitt ekki að setjast niður og skrifa en ákvað að koma með smá yfirlit frá okkur

Jólin voru náttúrulega æði þó langt sé um liðið. Benedikt var ægilega ánægður með gjafirnar sínar og ég líka.
Áramótin voru fín líka. Var reyndar kölluð á vakt á gamlárskvöld vegna veikinda. Var í um fjóra tíma en náði að vera hjá pabba yfir miðnætti.
Hingað til hefur árið verið frekar rólegt hjá okkur. Áfram bara vinna og rólegheit um helgar. Kíkti reyndar aðeins út á djammið á þrettándanum en segi það sama og áður... finnst djammið orðið glatað.  Næst verður sko farið á sveitaþorrablót á Laugarvatni með Blöndahls-fjölskyldunni aðra helgina í febrúar.

Benedikt fékk sendingu frá frændfólkinu í Bolungarvík. SKÍÐI. Hann var svo æstur í að prófa að hann klæddi sig í skíðaskóna og fór út í garð. Held að hann hafi sjaldan skemmt sér jafnvel, fæturnir fóru í kross og hann réð ekki við neitt en skellihló samt alveg svakalega. Verð að drífa mig með hann í brekkurnar bráðlega. Fórum reyndar í gær upp í Breiðholt í skíðabrekkuna þar og renndum okkur á snjóþotu. Held að toppurinn hafi verið að fá að spræna á trén í skítakulda.

Annars bið ég að heilsa ykkur núna.

GLEÐILEG JÓL!!!

Muniði eftir leigjendunum sem ég leigði íbúðina mína í Keflavík og skiluðu henni ömurlegri til baka??  Þessi fífl eru núna að væla í öllum yfir því að VÍS hafi svikið þau... held að þau ættu nú barasta að líta í eigin barm. Karlinn réðst meira að segja á skrifstofumann hjá vís. Held að ég megi teljast heppin að hann kom ekki í íbúðina þegar ég tjúllaðist yfir fráganginum og barði mig

Annars hefur lítið gerst síðan síðast. Hef samt verið alveg á fullu... Bakaði piparkökur með Siggu granna og strákunum á þriðjudag. Fór síðan í gær á Selfoss með Ragnheiði og pabba hennar til að halda smá fræðslu fyrir fólk af sambýli um samskipti kynjanna. Fannst það ofboðslega gaman þó ég hafi ekki alveg vitað um hvað ég átti að tala. Gekk held ég ágætlega.

Hvað haldiði... fór í Bónus úti á Nesi í dag og fékk þessa fínu rispu á bílinn minn í leiðinni. Einhver dúndraði svoleiðis í bílinn minn og ók í burt Ég sem ætlaði måske að selja hann eftir áramótin. Féll örugglega slatta í verði við þetta.

Er núna að passa gæjana hennar Siggu granna. Voru ákaflega stilltir og góðir þó ég hafi nokkrum sinnum þurft að sussa á þá.Mætum svo öll saman í íþróttaskólann í fyrramálið. Held að ég reyni svo að kíkja í ræktina (ekki veitir af þar sem ég er búin að liggja í Hersey's peanutbutter kisses í gær og í dag).

Helgin búin og nóg að gerast. Fór á jólabingó á föstudag, vann auðvitað ekkert en fannst þetta samt ægilega spennó. Kíkti svo á Sálarball með Gunnhildi hjúkkupíu. Ágætisball en er alls ekki að fíla players. Voðaleg hverfisstemning þarna, fullt af gömlum pervertum. Held að ég hafi ekki drukkið nóg fyrir svona ball Svaf til hádegis á laugardag (Benedikt var sko í Keflavík hjá ömmu og afa alla helgina) og fór svo með ömmu í Kringluna. Náði að kaupa mér þrjá boli í Zöru, ekkert smá dugleg. Um kvöldið var jólahlaðborð með deildinni minni á Hrafnistu, fórum í Skíðaskálann í Hveradölum. Æðislegur matur, borðaði heldur betur yfir mig. Kíkti síðan á stelpurnar úr hjúkkubekknum og var komin heim rétt eftir miðnætti. Er maður orðinn gamall eða hvað að þola ekki djamm tvö kvöld í röð. Annars var ágætt að ná góðum svefni. Eyddi síðan fullt af monningum í Smáralind í dag.

Bara mánuður og einn dagur í jólin. Trúiði þessu??? Get hreinlega ekki beðið. Búin að fara í gegnum jóladótið mitt og jóladótið á Hrafnistu og er í skreytingarstellingunum. Ætla reyndar ekki að vera jafnsnemma í því og mamma sem er búin að setja upp litla gervitréð inni í stofu. Pæliði í því, hún ætlar ekki að hafa ekta stórt jólatré um jólin. Heilinn á mér hins vegar hringsnýst yfir því hvar ég á að setja jólatréð okkar. Fyrsta skiptið sem við erum með svona stóra stofu og nóg af plássi að velja um.

Ég ákvað að fresta því að fara í laseraðgerðina fram í febrúar. Sá fram á það að hafa ekki efni á því. Fasteignasalaaulinn tók svo ógeðslega mikið fyrir að selja íbúðina, heilar 336 þúsund krónur fyrir ég veit ekki hvað. Finnst þetta algjört okur. Gekk ekkert smá erfiðlega að fá fólkið til að skrifa undir. Kom ekki nokkrum sinnum á umsömdum tíma og loksins þegar hún sagðist ætla að koma og ég mætt til Keflavíkur, lét enginn sjá sig. Ég ákvað reyndar að skrifa undir og fékk svo borgað seinna um daginn. Þvílík gleði að geta borgað alla kreditkortareikningana og klippa kortin. Bílífit or not, ég var komin með þrjú kort. Algjör bilun.

Benedikt heldur áfram að þeysast upp. Orðinn svo stór. Föt sem eru tiltölulega ný eru bara að verða of lítil. Ef ykkur vantar að gefa honum eitthvað í jólagjöf þá eru það föt sem hann vantar. Ég var að spá í fyrst að gefa honum hamstur. Hann langaði reyndar ekki í hann heldur frekar í kanínu. Það dýr vil ég sko alls ekki sjá hérna inni hjá mér svo að ég ákvað að blása það af. Núna er ég að pæla í að gefa honum trommusett úr Hagkaup.Held að hann verði ægilega ánægður með það, veit hins vegar ekki um mig. Ein spurði mig hvort ég væri haldin einhverri sjálfseyðingarhvöt.... ætli það ekki.

Um helgina er ég að plana að fara á djammið. Sigurborg ætlar að halda Víkaradjamm. Hef ekki farið neitt út síðan um miðjan okt. þegar pabbi hélt upp á afmælið sitt. Ætla svona aðeins að melta þetta.

Úje... búin að selja íbúðina. Kaupsamningurinn verður vonandi undirritaður á morgun eða strax eftir helgi. Ekkert smá fegin að þetta skuli vera komið í höfn. Fasteignasalinn hringdi svo í mig á mánudag og sagði að ég þyrfti eiginlega að renna yfir íbúðina eftir leigjendurna. Ég dreif mig því til Kefló (með Benedikt veikan) og brá heldur betur í brún þegar ég mætti á svæðið. Íbúðin var í RÚST!!!! Allir veggir útkrotaðir, drulla út um allt, dót sem skilið var eftir og ég veit ekki hvað og hvað, meira að segja hland í klóinu. Eyddi því 5 dýrmætum klukkutímum í að þrífa SKÍT eftir annað pakk. Hellti mér gjörsamlega yfir fólkið þegar það sagðist sko ekki ætla að þrífa betur né taka dótið; ég gæti sko bara hirt það. Ég ákvað að skella öllu dótinu í bíllinn og henda því á lóðina fyrir utan húsið þeirra. Ætlaði sko ekki að gera þeim þann greiða að fara með það á sorpu. Maður verður heldur betur að passa sig á svona pakki....

Annars gengur lífið sinn vanagang. Vinn mína vinnu og Benedikt er í leikskólanum. Frekar rólegt allt hjá okkur. Fór út að skemmta mér um miðjan október og ekkert djamm á næstunni. Ég er nefnilega að fara í laseraðgerð á augunum 17. nóv. (ef ég finn pening fyrir því) og má ekki mála augun neitt vikuna á undan. Glætan spætan að ég fari út að skemmta mér með gleraugun og ómáluð Við lillimann verðum því í rólegheitum næstu vikurnar.

Deildin mín á Hrafnistu er að plana að fara til útlanda næsta vor í nokkurs konar skemmti- og vísindaferð. Auðvitað varð ég að troða mér í nefndina. Ég kemst alltaf betur og betur að því hvað ég er frek... eins og Ragnheiður sagði um daginn: "ég held að ég hafi ekki hitt eina einustu meyju sem er ekki ákveðin". Það er bara spurning hvert við eigum að fara. Mig langar helst til Parísar, New York eða Ljublana í Slóveníu en vandamálið er að við þurfum að finna eitthvað elliheimili til að skoða. Hugsa að það væri auðveldast að fara til New York. Sé til... verð nefnilega að fara að ganga í þetta bráðlega.

Æi, ég er svo löt. Krít var ÆÐI.... en alveg súperheit. Við vorum eiginlega orðin uppgefin eftir 2 vikur og fannst frábært að komast heim í rigninguna. Annars eyddum við dögunum í sólbaði og sundi ásamt ströndinni. Get ekki sagt að það hafi verið mjög leiðinlegt
Síðan kíktum við tvisvar í stærstu dótabúð sem ég hef séð. Eyddi slatta af monníngum þar. Við fórum líka í vatnsleikjagarð. Munaði engu að við Benedikt brenndum af okkur iljarnar þegar við gengum yfir trébrú þar, þeir hefðu alveg mátt setja viðvörunarskilti um að brúin væri tíu sinnum heitari en stéttin. Benedikt vildi svo endilega fara í lest þannig að við fórum í fjallaferð í lest (sem var reyndar á hjólum).

Benedikt byrjaði síðan í nýja leikskólanum. Alveg ágætis leikskóli. Ég byrjaði svo í nýju vinnunni í ágúst. Mikið að komast inn í og svolítið öðruvísi að fara að stjórna. Ég réð mig sem sagt sem aðstoðardeildarstjóra. Nú verður fólk sko að passa sig að  messa sig ekki við mig   Nei, nei, annars er ég mjög góður boss... vonandi.

Síðustu helgi fórum við á Ljósanótt í Kefló. Röltum bara um göturnar og horfðum á skemmtiatriði. Fórum svo heim um kvöldmatarleytið og misstum því af flugeldasýningunni. Við sjáum sprengjurnar hvort sem er um áramótin. Á sunnudaginn fórum við í heimsókn til Guðrúnar Svövu upp í bústað. Fórum með henni og Palla litla í sund og borðuðum síðan með þeim kökur.

Ég er farin til Krítar. Vona að sólin skíni skært á ykkur hér á Fróni. Hún skín alveg örugglega á okkur